పార్నంది పద్య సౌరభం
శివునూరి లలితాకృష్ణ
SA (తెలుగు)
నివాసం : సిద్ధిపేట
చరవాణి సంఖ్య:7842906949
శీర్షిక:పద్యవైభవం
1.ఉత్పలమాల
పద్యము పద్మమై మృదుల భావ పరాగ పరీమళమ్మిడున్
పద్యము సద్మమై వెలుగు వాజ్మయ దీప్తుల వైభవమ్మునన్
పద్యము వాద్యమై వసుధ వాక్సుధలన్ మురిపించుచున్సదా
పద్యము హృద్యమై వరలు వర్ధిలు నిత్యవినూత్నశోభలన్
2.ఉత్పలమాల
పద్యము మేఘమై కవన వర్షపుధారలదన్పు నిచ్చలున్
పద్యము రాగమై హృదిని స్వాదము హ్లాదము నింపు స్వచ్ఛతన్
పద్యము వేద్యమై తనరు పాఠ్య ప్రబంధపురాణ వర్ణనన్
పద్యము పాద్యమై నిరతభారతిసేవ దరించుభాగ్యమౌ
3.ఉత్పలమాల
పద్యము భాసమై ప్రబలు భారత భారతి కీర్తిచంద్రికన్
పద్యము లాసమై వెలయు భాగవతమ్మున భక్తి భావనన్
పద్యమునాశువై చెలగు ప్రాజ్ఞుల నోట వధాన కేళిగన్
పద్యము భూషయై యలరు వాణివరమ్మున మానవాళికిన్
4.ఉత్పలమాల
పద్యము తీవెయై పదము పల్లవమొందగ పందిరేయునా
పద్యము పూవునై తనరు
వర్ణవిలాసపుసౌకుమార్యతన్
పద్యము తావియై యతుల ప్రాసల గంధము పూయునింపుగన్
పద్యము మావియై మధురభావరసామృత ధారయౌ ధరన్
5.ఉత్పలమాల
పద్యము ప్రాచ్యభావనల శ్వాసగనిల్చెను శాసనావళిన్
పద్యముతెల్గుభాషయను వార్థిని వారధి వృత్తజాతులన్
పద్యము సంస్కృతీ పథము భవ్యము నవ్యము భారతావనిన్
పద్యము సాహితీ సుధల వాహిని మోహిని భారతీస్తుతిన్
Comments
Post a Comment